الدكتور ماهر العباسي : 99 % من التوانسة يستعملو في الماسك بطريقة تزيد في خطورة انتقال الفيروس !

الدكتور ماهر العباسي : 99 % من التوانسة يستعملو في الماسك بطريقة تزيد في خطورة انتقال الفيروس !

قال الدكتور المهتص في التبنيج والتخدير ماهر غباسي ان الماسك سلاح ذو حدّين. 

وأضاف في تدوينة على فايسبوك، شرح فيها كيفية ارتداء الكمامة اثناء مزاولة دراسة الطب :

كيف نقراو الطب وخاصة كيف نوليو ندخلو لبيت العمليات نتعلمو حاجة إسمها " Faute d’asepsie" إلي هي كان نحاولو نترجموها هي خطأ في المحافظة على تعقيم اليدين يعني كيف تلبس الڤواندوات ما عادش يلزمك تمس حتى حاجة موش معقمة.

في البدايات نعملو عشرات الأخطاء ومانفيقوش ويصلحونا إلي أكبر منا وبعد بالممارسة والخبرة تولي أقل خطأ تفيق بيه . وخاصة تفيق قداش تقريبا مستحيل ما تعمل حتى خطأ إذا كان تطوال المدة لساعات متتالية وينقص التركيز متاعك .

يقول القائل علاش تكسرلنا في ريوسنا نهار إثنين صباح بقصة حياتك ؟ الreflexe الي ولى عنا في سرعة وسهولة أننا نفيقو بأي شخص يعملfaute d’asepsie نوليو نستعملوه منغير مانفيقو في الشارع .... وقت نتفرجو في التوانسة كيفاه يلبسو الماسك . حاجة من وراء العقل .

راو الماسك هو عبارة على حاجة لاصقة لخشمك وفمك يعني أكثر زوز أماكن إلي يدخل منهم الفيروس ... وهو مجعول باش يمنع الفيروس الطائر أنو يدخل ... متفقين ؟

باهي ولكن الفيروس ماهوش كان طائر الفيروس زادة حاطط ... وين حاطط ؟ عالكوبة متاع الباب عالطاولة عالستيلو عالفلوس عالماكلة على كل حاجة يتعداو بحذاها ويمسوها بني آدم ... دونك إنت يا صديقي العزيز حط في مخك أنو أي حاجة تمسها تنجم تحط الفيروس في يدك ... ولكن في اليد ماعندو مايعمل ... وقتاش يدخل لبدنك ؟

وقت تهز يدك وتمس بيها وجهك .... مثلا مثلا باش تستوي الماسك والا باش تهبطو والا باش ترجعو . Alors que لو كان ماجيتش لابس ماسك راو تركيزك قعد على يديك وراك غسلتهم وقضيت عالفيروس .

شنوة يحب يقول : الماسك وقت يتم إستعمالو بإحترام قواعد صارمة جدا هو وسيلة باهية للحماية ... ولكن وقت يتم إستعمالو بإستهتار يولي وسيلة خطيرة لإيصال الفيروس للخشم والفم ويعطي إحساس خاطئ بالأمان .

===> في تونس إلي قاعد نشوف فيه 99,9% يستعملو في الماسك بطريقة كارثية . ===> يظهرلي نركزو على غسلان اليدين والتباعد الإجتماعي أفضل مالتركيز عالماسك .

ونعملو حملة كبيرة نفسرو للناس خطورة إستعمال الماسك على طريقة الليقة تجيب .


شنوة رأيك ؟

like
1
dislike
0
love
1
funny
1
angry
0
sad
0
wow
0