د.زكريءا بوقرة : "ثما معطى جديد يخوّف حول فيروس كورونا و ماينفع معاه كان إغلاق الحدود"

د.زكريءا بوقرة : "ثما معطى جديد يخوّف حول فيروس كورونا و ماينفع معاه كان إغلاق الحدود"

كشف الدكتور زكرياء بوقرة طبيب الإنعاش والتخدير في تدوينة نشرها على صفحته على فايسبوك عن نوع جديد من فيروس كورونا، بدأ في الإنتشار في الدنمارك وباقي الدول الأوروبية، وجاءت تدوينة بوقرة كالتالي :

 

كان لاحضتو من الي بدينا الحملة للحجر الصحي الشامل نهار 2 اوت ما عادش مركز بارشا على تسكير الحدود وعلى الحجر الصحي الاجباري. هذما اجراآت مهمين بش يمنعونا من انتشار العدوى من الخارج. اما وقت الي تولي العدوى محلية يولي ما فما كان الحجر الصحي الشامل وهكة والا هكة كي يصير الحجر تو تتسكر معاه الحدود. اما ليوم فما معطى جديد. معطى خطير. معطى يخوف. قبل كل شيء خلي نفسرلكم شوية شنوة الفيروس. الفيروس هو كائن شبه حي. يتمثل في معلومة جينية مقيدة في ADN والا في ARN. (صديقنا الكورونا مبني على الARN). والcode هذا مغلف في غشاء من البروتين و من فوقو غشاء آخر من الدهون (هاو علاش الصابون يقتلو). الغشاء هذا يمثل السفينة الفضائية للفيروس وهي الي تخليه يحارب في الهواء لين يلقا خلية يدخل فيها ويتكاثر فيها. علاش قلتلكم شبه حي؟ على خاطر على عكس البكتيرية الي هي خلية كاملة الفيروس لازمو يدخل في وسط خلية يخلط الcode متاعو مع الcode متعها وهي تصنع منو مليارات النسخ. بش يدخل لخلية موش بالساهل. فما مفتاح لازم يكون عندو ويركب في الكوبة متع الخلية. المفتاح هو البروتين الي ضاهر في الغشاء البراني للفيروس والكوبة كيف كيف بروتين تبدا موجودة في الغشاء متع الخلية. كي يلسقو في بعضهم يدخل لفيروس للخلية ويبدا يتكاثر. وهذا زادا لواش المضادات الحيوية متاعنا يحاربو الفيروس بعقلانهم للمفتاح هذا. حتى لتوة نشالله مازلتو تبعو. هذا تبسيط لحيات اي فيروس. اجا توة نرجعو لصديقنا الSARS-COV2 شهر كورونا. حبيبنا صحيح شرير. صحيح يعذب بارشا عباد. صحيح يقتل بارشا عباد. اما يتسما ولد عايلة ومتربي. علاش؟ على خاطر من الي ضهر عام ناول في الصين قعد ينتشر كان بيناتنا نحنا البشر. تتذكرو حكاية الكوبة والمفتاح. الكورونا ما عندو كان المفاتح متع كوب خلايا الانسان. صحيح سمعنا ببعض القطاطس والكلاب مرضو في بلجيكا هولاندا امريكا وحتى صيودا ونمورا في حديقة حيوان New York اما العدوا كانت ديما من شيرة وحدة. الانسان هو الي عدا الحيوان. ليوم تبدلت الوضعية. تتذكرو قلتلكم الكورونا الlogiciel متاعو مصبوب على الARN؟ مافماش فرق كبير بين الزوز اما الفرق هو انو الARN عندو سهولة اكثر انو يتحول. انو تصير فيه mutation. حرف بركة من الcode يتبدل ينجم يصنعلك بروتين جديدة وبخصائص مختلفة تماما. وهذا الي صار. امام تخاذل الانسانية في محاربة الفيروس.عطيناه اكثر حاجة هو مستحق ليها والي هي الوقت. في العام هذا فما انسان مريض الاكثر في الدنمارك يقابل حيوان اسمو المْنَكْ. يعديه. وفي وسط سي المنك هذا يصير تحول جيني ويولي يعدي في اصحابو المنكات لخرين. وبعد يدور يدور ويعاود يعدي الانسان.ليوم اكثر من 6 دول اوروبية لقاو الاصابة في الحيوانات هذما. المخطر في الحكاية هو انو كان ينتشر النوع الجديد متع الكورونا بش تصعاب علينا محاصرة الجائحة بالف مليار مرة. هذا لواش ليوم الدنمارك بدات في قتل اكثر من 17 مليون منك. الفرق بين الكرونا 1.0 والكورونا2.0 هو انو الاولى نجمو نعملو حجر صحي وتوفا الحكاية في شهرين ثلاثة. اما الحيونات ما تنجش تعمللهم حجر صحي. ووقتها يا عندك القدرة انك تتخلص من الحيونات المصابة الكل بتكلفتها الاقتصادية الاخلاقية والاكولوجية يا بش يستوطن الفيروس. هذه بوادر جائحة داخل الجائحة. كان ليوم يعدي المنك شكون قال غدوة مايوليش يعيش بين القطاطس العلالش والا الدجاج... فما حاجة مهمة زادا لازم ننتبهواها. هي انو البحوث الاولية قاعدة تقول انو درجة التساق المضادات الحيوية بالبروتينات متع الversion الجديدة متع الكورونا ضعيفة جدا. بلوغة اخرى الي مرضو بالكورونا الاولى ينجمو يمرضو بالكورونا الثانية والvaccin متع الكورونا الاولى ينجم يكون موش فعال على الثانية. تخاذل الحكومة مع الفيروس توة ولا اخطر من اي وقت مضا. توة بدينا نقتربو من stage التنين. توة تخاذلهم موش يعرض في 180 الف تونسي للموت اما بعد عام والى عامين كل شيء يوفا. لا توة تخاذلهم ينجم يدخلنا في دوامة وبائية ولاد ولادنا ينجمو يمرضو بيها وتنجم تقتل ملاين التونسة على عقود. هذا لواش لازم نفيقو على وضعنا توة. تسكير الحدود والحجر الصحي الشامل لازم يصير ليوم قبل غدوة. مستقبل اجيال قاعد يضيع بين ايدينا.... #تسقط_دولة_الموت #حجر_صحي_شامل


شنوة رأيك ؟

like
2
dislike
0
love
0
funny
0
angry
1
sad
1
wow
1