ياسين العياري يكتب عن "ألفة الحامدي ...الكمين"

ياسين العياري يكتب عن "ألفة الحامدي ...الكمين"

تونس 24: نشر النائب ياسين العياري تدوينة مطولة تحدث فيها عن ألفة الحامدي و التونيسار و هذا نصها : فلنتحدث في ألفة الحامدي، تونسار، الكمين! في البداية، شكرا لكل من كلف نفسه عناء السؤال، شكرا لكم جميعا، يبدو أني سأضطر لإلغاء كل إلتزامات هذا الأسبوع أيضا، التحرك أقل ما يمكن، و الخضوع للتحاليل و الفحوص حتى يجد الأطباء الخلل. فلنبدأ بالتعيين! منذ متى حاسبنا مسؤولا؟ قيمنا عمل مسؤول؟ وقع إنتداب مسؤول بطريقة شفافة؟ لم نفعل أبدا! كانت دائما حكاية ريزوات و كوبيناج و لوبيات و مصالح! و بعد ما يخرج المسؤول : - الي عينوه و قطيع الي عينوه يخرجو يطبلوله و يردوه مسكين و خاطر تصدى لندرى شنية و رفض إندرى كيفاش و فارس بغداد و صقر قريش و جو بلوغ ما تونيزي - اللوبي الي ضدهم و جماعته و قطيعهم يردون فاشل و بهيم و خاين و عميل و ظهر الحق و زهق الباطل - العياشة، متع التراندينغ و الفينيمون دو مود، نهار الي يتعين يضربوله البندير، نهار الي يطيح، تكثر سكاكنها! الحقيقة؟ لا أحد يمكنه النجاح في هذه البلد! النجاح، لا يحدث! النجاح يبنى! النجاح ليس و لم و لن يكون شخصا! النجاح فريق، طرق عمل، تخطيط و حلم و برشة خدمة! منذ تعيينها، لم يكن سرا أن ألفة الحامدي غير مؤهلة لتسير الغزالة! لكن صدقا؟ من مؤهل؟ من قادر أن يسير شركة فيها 5000 موظف زايدين، طرق عمل بدائية، ينخرها الفساد، في مجال ضاقت فيه المنافسة عالميا و كان يجب محاولة إنقاذها منذ 2001. التونسار، زوز حلول : - يا نحيو 1200 مليار من الصحة و التعليم و الماء و الفلاحة و التشغيل، تشد بيهم يدها 6 شهر إلى عام و نص و بعد نعاودو نصطعوا في الحيط - يا نبيعوها طيارات و بيروات في الخارج و كاترينغ و تكنيك، الكلها عن بكرة أبيها، الفلوس تقسمها الخدامة و تسكر و نحلو شركة جديدة، طيارات جدد، الكلها رقمية، ب systeme d'information عصري، عدد خدامة اللازم في اللازم، يملك فيها دافع الضرائب، يستفيد من أربحاها، لكن تسييرها و الجزء الأكبر من راس مالها إستثمار خاص! عصر المعجزات، متع دواء الكورونا بيو و 10 طرانط يورانيوم و العصا السحرية الي بش تنقذ تونسار و الستام و الرنتآ ... إنتهى! عصور صاحب البريد و أهل الكرامات إنتهت! أيام حابسة و تمركي، إندثرت! نرجعوا لموضوع ألفة :قدر الجميع الفشل في هذا البلد، مادمنا نعتقد أن سبب النجاح و الفشل، شخص! ماكانتش بش تنجح في الحالات الكل، لكن كانت تنجم ما تفشلش هكة! بهذه الطريقة! السيدة المديرة العامة، حولت المؤسسة إلى براندينغ لذاتها! صفحة الشركة ولات أنستغرام لشخصها! مع .. المبالغة السخيفة في كل شيء، مع دغدغة عواطف جزء من الشعب الي مزال يؤمن بالمعجزات! هاني نائب منتخب، رئيس الحكومة و وزير الخارجية ياخذو الثقة من عندي و نراقبهم و نراقب خدمتهم، كل ما نقابل مسؤول أجنبي، نبعث للخارجية نعلمهم قبل و بعد اللقاء نبعثلهم تقرير! السيدة المديرة العامة، دخلتها فركة و عود حطب! كانت تعلم أنها لن تبقى طويلا، فخدمت نفسها بالشركة لا العكس! نعم ألفة، كنت بش تفشل في كل الحالات، لكن كان بإمكانك الفشل خير من هكة! و فشلك بهذه الطريقة، ربما ترى فيه فشلك الشخصي، المهم هاك حركت إسمك و دخلت في clivage ينفعك سياسيا، يسهل الإستثمار فيه! لكن غالطة! فشلك يرجع سنوات لتالي برشة نساء و برشة شباب، تاكل في الحجر باش تنجم تفك في بلاصة في هذا العالم القذر! نجيو للإتحاد! الإتحاد تحول إلى بيروقراطية ثقيلة مريضة معطوبة، تعطي خيمة للفاسد و الباربو و السارق و الصباب و الكسول إلا من رحم ربي! الإتحاد أصبح كلمة الحق التي يراد بها الباطل! سمعت أنهم يريدون التحقق من شهائد ألفة! حقكم! لكن حبيت نتحقق من شهائد بلقاسم العياري و الدبك، هاذم مثلا يهموني خاطر عينتوهم في الدولة، قنصل و ملحق إجتماعي يخلصو من فلوسي.. بالأورو! شنية شهايدهم يعيشكم؟؟ يقول جدي حطاب ربي يرحمه : بليس ينهى ع المنكر! نعم، تونس تحتاج إلى نقابة قوية وازنة! تبنى مع النقابيين لا ضدهم! لكن موش هذه! موش عصابة مفسدين باربوات هدفهم الحماية النقابية لأعمالهم الخسيسة و مستواهم الضحل و مص ضرع البلد إلى أن ينز دما بعقلية نفسي نفسي.. و لا أعمم، فحتى في إنحدارها الأخير، مزال في قلعة حشاد من يستحق أن ترفع له القبعة. نجيو لحكاية إستقالة من عينها! كلام صواب! لكن كالعادة، كلمة حق أريد بها باطل! شعار يرفعه بكاية حكومة الفخفاخ، الذين طال وحمهم و ما شفيت قلوبهم.. هل ستطالبون بإستقالة الرئيس الذي عين الفخفاخ و المشيشي؟؟ هل طالبتم بإستقالة الي عين صالح بن يوسف. لا! فهمتو علاش قلت كلمة حق أريد بها باطل؟ تغوصون يوما بعد يوم في النفاق و الصبيانية و التناقض. مادام درنا للموضوع هذا، هات نحلوا قوس، هو بطبيعته post طويل لن يقرأه أحد! يعيشكم، راهو الرئيس و الوزير و الي تحب، يقسم على إحترام الدستور! الدستور يقول الرئيس يستشار فقط في الدفاع و الخارجية! ريتو الرئيس الي يحب على العدل و البيئة و الداخلية؟ موش المشيشي خانه! هو خان الدستور! و القسم الي عمله المشيشي راهو كيما قلنا على إحترام الدستور، لا على إحترام رغبات من يريد أن يكون الحاكم بأمره! نجيو للكمين! صاااااحبي... إذا رئيس الجمهورية يجيه طرد مسموم، شلته وصلت في التحليل إنه من الموساد، يحطه في الديشكتوز و تصاب مديرة الديوان بالعماء المؤقت، هذا الكل و الظرف ما فيه شيء، فعادي غدوة تلقى وزير بش يفكك مؤامرات وهمية و رئيس مجلس نواب بش يحول سبخة السيجومي لقطب سياحي.. و رئيس مدير عام يتجنب كمين! هم يخاطبون شعبا يؤمن بالخرافة و المعجزات، يتعبه التحليل فيلجأ للمؤامرة! و سيصدق! هو يصدق كل مرة! المشيشي، إرحل! هل تذكر ماذا قلت لك في اللقاء الوحيد الذي جمعنا؟ قتلك فاش تعمل؟ أنت يتيم هنا و لا أصدقاء لك و ماك بش تنجم تعمل شي، حتى و إن أردت! وقتاش حضرت إش بش تعمل و مع شكون بش تعمله! البحيري قال لن نتخلى عنك، فأبشر، هذا يعني أن صفقة تعويضك بدأت! حتى أنت، قدرك أن تفشل، لكن كان بالإمكان أن تفشل خيرا من هذا! جاتك فرصة للفشل المشرف، الفشل الذي يبنى عليه، فضيعتها. على كل، شكرا لمن قرأ كل هذا، أنا بيدي ما عاودتش قريت! شكرا مرة أخرى لمن سأل عن صحتي، كانت اياما عصيبة، إن شاء الله الجاي خير! الي قلبه حي، البلاد هذه تقتله ناقص عمر! إلى لقاء قريب.


شنوة رأيك ؟

like
2
dislike
0
love
0
funny
0
angry
0
sad
0
wow
0