عرس ولد النقابي، و الأخلاق قبي قبي

عرس ولد النقابي، و الأخلاق قبي قبي

يظهر لي في المرحلة القادمة باش نسيب الإرهاب و الفساد و العالم جملة، و نحل حرب فقط على الأخلاقوية و الصوابية السياسية، و شغل المدّبية 2.0 أو صنصرة ما بعد الحداثة في هالحفرة.

اللي ينشر تفاصيل حياته الشخصية على الأنترنت لازمو يقبل أنها تولي موضوع نقاش عام، و الناس الكل تتدخل فيها، و تعلق عليها، خاطر هو اللي اختار هذا. كي تبدا شخصية عامة، عادي الناس تتبعك و تعلق على أفعالك، و كيف تبدا شخصية سياسية، عادي جدا الناس تركز معاك، و تسأل على فلوسك منين جات. دايور عندنا قانون موجود في إسمو "مكافحة الكسب غير المشروع"، و معروف بقانون "من أين لك هذا".

لذا بربي أعفيونا من لغة الحنّانات متاع "آش يهمكم فيه، عرّس ربي يهنيه". نحكيو على خبر منشور للعموم يهم شخصية عامة، لذا اللي يحب يهنّي هاوكي الثنية قدامو، أما ما توليولناش فوج حفظ نظام العرابن و الفروحات في فيسبوك، مع الشكر.

ثانيا، راهو كي ناس تصرف مليار و نص في عرس، من حق أي مواطن أنو ينتقد و ينبّر و يسخسخ و يعمل اللي يحب، خاطر هذا اسمو بذخ لغادي من فاحش، متاع ناس تحب تظهّر ثراءها، دونك تحب الناس تحكي عليها. ما تجيش مبعد تقول لنا "أمّا أحكيو بالباهي، ولا ما تحكيوش"، خاطر نبعثوك ترهز. موش كي تعملها كيم كارداشيان تولي قعرة و سطحية و معقدة، أما كي يعملوها "أهل الريف" ولا "الشعب" تولي ياسر وهرة و عادات و تقاليد و كرم و هاك اللعب المريش.

ملحوظة : تُضاعف العقوبة المنصوص عليها بهذا الفصل كي يبدا المعني بالأمر جايبها مناضل صنديد من أجل الفقراء و المهمشين و الكادحين و كل هؤلاء الذين ما قعدتوا كان تخدموا بيهم، و نتمنى تترزاو فيهم باش نشوفكم كيفاش تعيشوا.

أخيرا، حتى كان نسمعو كلام مدبية النيو شعبوية الريل ماضافاكرز اللي يعرفوا الشعب و الريف و الأعماق خير منا الكل، يقعد من حقنا باش نعرفو شكون هوما "المسؤولين الكبار" اللي عطاو بقيمة 500 مليون للسيد، و اللي حكى عليهم "أمين المال" متاعو، خاطر هاذي فيها وضعية تضارب مصالح تضرب تصرع، و أنا ما ننزه حتى حد من حتى شيء، لذا نحب نعرف شكون هم المسؤولين الكبار في الدولة اللي خلطوا لنص مليار مع بعضهم، تبرعات لولد نقابي، و الأهم : نحب نعرف مقابل شنوة بالضبط، خاطر فلوس كيما هكة ما تتعطاش بلاش.

من حقكم تعيشوا فيها تكتلات و عشائر، و كل واحد يدافع على عصابته/عشيرته كيما يحب، أما ما تردوش نفاقكم أخلاق، و تواطؤكم رفعة، و إصطفافكم تحضّر، خاطر ماناش بهايم ليكم، الى حد الآن على الأقل.

أخيرا، صوتوا لحركة تونس بلاصة، و نوعدوكم اللي كل مواطن نلقاوه يبذر في الفلوس هكة، تتصادر أملاكه بدون محاكمة، و تحال الى خزينة الدولة، و يعود كل راس شهر يجي يقبض شهرية في ماندة من الضمان الإجتماعي.


شنوة رأيك ؟

like
1
dislike
0
love
0
funny
0
angry
0
sad
0
wow
0